NAXÇIVAN DÖVLƏT UNİVERSİTETİNİN ELMİ ƏSƏRLƏRİ

Xülasə

Məqalədə frazeoloji vahidlərdən bəhs edilir. Bu məqsədlə ingilis dilində bir sıra frazeoloji vahidlərin tərkib hissələrinə diqqət yetirilir. Dünyanın müxtəlif dillərində insanın nitq fəaliyyəti prosesində formalaşan ifadələrə rast gəlirik. Maraqlıdır ki, əksər dilçilik ədəbiyyatında frazeologiya ilə idiomatiklik eyniləşdirilir. Ekvivalent sözlər kimi idiomatik və frazeologiyadan istifadə olunur. Məqalədə bu məsələyə münasibət açıqlanır. Bundan əlavə, frazeoloji vahidlər müxtəlif elmlərin obyekti hesab olunur. Lakin əksər alimlər bunu dilçilik elminə aid edirlər. Dilin ayrılmaz vahidləri sayılan frazeoloji vahidlər çoxsaylı etimoloji və leksik-qrammatik xüsusiyyətlərə malikdir. Məqalədə frazeoloji vahidlərin tərkib hissələrinin həmin xüsusiyyətlərin təzahüründə iştirakı əsaslandırılmışdır. Məqalədə göstərilir ki, frazeoloji mənanın əmələ gəlmə mexanizmi, semantik quruluşu və bir sıra qrammatik xüsusiyyətləri tədqiq olunsa da, frazeoloji vahidin strukturunun hər bir komponentinin təsir problemi maraqlı və aktual məsələlərdən biri kimi öz araşdırmasını gözləyir. Bu, məqalədə aktual problem kimi təqdim olunur. Frazeoloji vahidlərin ümumi mənası ilə yanaşı, tərkibindəki hər bir komponentin ayrı-ayrı semantik və qrammatik xüsusiyyətləri vardır və onların bu aspektdə öyrənilməsi vacibdir. Məqalədə, əsasən, cümlə formasında olan atalar sözləri və məsəllərin tərkibinə nəzər salınır. Əsas nitq hissələri ilə ifadə olunan ifadələrin komponentləri təhlil edilir. Tədqiqatlar təsdiq edir ki, ingilis dilində frazeoloji vahidlər demək olar ki, bütün əsas nitq hissələrini əhatə edir. Lakin onlar aktivliyinə görə bir-birindən fərqlənir.